政壇：證監執董人人有薪加 - 太陽報

政壇：證監執董人人有薪加 - 太陽報

證監會尋日發表最新年度年報，各高層嘅年薪自然「大現形」。根據年報，行政總裁歐達禮二○一二年年度人工總計係三百三十萬元。但大家要知道，佢係舊年十月一號至正式返工，即係話三百三十萬元只係佢半年人工啫！但呢個數仲未計可能有俗稱花紅嘅酌情薪酬！雖然半年搵三百三十萬元已算作打工皇帝，但對比佢以往喺律師樓做，可能只係「濕濕碎」。

至於其他執行董事，全部都有人工加。張灼華二○一二年年度薪酬共有六百八十三萬元，微升2%。人稱「打虎英雄」嘅施衛民，人工則有六百一十六萬元，上升5.6%，其中酌情薪酬為一百三十二萬元。施衛民近年屢破大案，花紅增加，相信都冇人會有異議！