翟紹唐

1-4-7 NM
近來曝光率最高的大狀，要算翟紹唐。

在馬尼拉死因研訊中擔任研訊主任的他，差不多天天見報，曝光率比律政司司長黃仁龍還高。有傳，這位全港有史以來最年輕的資深大狀，是下屆律政司司長的熱門人選。

死因研訊完結後，身為監警會主席的他，又就警方用胡椒噴霧噴中八歲男童一事向記者交代進展。然後，他又以最低工資委員會主席身份，公開指責政府叫勞資雙方協商是不切實際。

曝光頻頻，卻再三強調對律政司司長一職沒興趣。突然炙手可熱，只因一世幸運，時勢造英雄。

年輕，有名譽地位，家庭事業美滿。○二年，翟紹唐獲委任為資深大狀，時年三十六，入行十年，是歷來最年輕獲委任這資格的大狀，至今紀錄仍未被打破。

但當時他認為自己根本未夠班加入資深大狀這個圈子，甚至想也沒想過提出申請。多得「龍哥」教路，才踏出這一步。

翟紹唐口中的龍哥，是律政司司長黃仁龍。

司長是豬頭骨

翟紹唐一生幾個重要決定，原來都跟黃仁龍有關。由申請做資深大狀，到答應做最低工資委員會主席，他也聽黃的意見，接任警監會主席，更是由黃推薦。「佢真係大整蠱，你可以話佢係我恩人，或者仇人。」公職越來越多，時間越來越少，很快變成公職王。

對於黃仁龍，他有讚無彈。「我叫佢龍哥，唔係講笑，真係覺得佢係大佬，睇嘢好透。佢好dedicated，有原則，律政司司長人選，睇唔到有better choice。」他形容律政司司長是豬頭骨。「做得好唔會有人讚，做差少少就俾人㓤。」

「真係無人搵過我，唔好煲啦，你哋不如捧捧Rimsky（袁國強）啦，或者Johnny Mok（莫樹聯）同Teresa（鄭若驊），Johnny靚仔啲，Teresa公職多過我。」

「其實唔好講到我同仁龍好熟，我唔想高攀。」他說，在工作上遇到難題，會請教黃仁龍，但實情是兩人為人父親後，因女兒關係才稔熟，翟紹唐亦因此出現轉捩點。

黃仁龍提攜上位

九年前的聖誕節前夕，他和黃仁龍出席完時任大律師公會主席梁家傑的飯局後，因為要趕回家湊女一同提早離場，途中黃問他會否申請做資深大狀。「我嗰時太後生，啱啱夠十年之嘛，睇吓我啲師傅， Geoffery Ma（馬道立）、Robert Ribeiro（李義），佢哋apply QC嗰時幾勁，我係咩身屍蘿蔔皮，同人邊有得比，我依然都覺得係咁。仲有lead我嗰啲係Ronny Tong（湯家驊）、Robert Tang（現任上訴庭副庭長鄧楨）同Benjamin Yu（余若海），佢哋幾勁，我同佢哋邊有得爭。」

但黃仁龍花盡唇舌力陳「有仔何不趁嫩生」的利害，兩人就於長江大廈外，在寒風下談了個多小時，翟紹唐終決定趕及在截止當天入紙申請。同年，黃仁龍和他一同獲委任為資深大狀，兩人抱着出世相差六日的長女合照。他們的長女和幼女剛巧都是同年出世，後來還成為同學，每朝早兩個男人都會親自送女上學，才開始熟落。

那時長女剛出世，翟紹唐心想，就算「升級」後生意減少，便主力湊女。幸情況沒想像中差，其中一個原因是，又有一班貴人間接「扶持」了他，包括三位前大律師公會主席余若薇、湯家驊和梁家傑。

時勢造英雄

「佢哋最當打嘅時候去咗做立法會，另外有啲就走去做官同移民，你可以話時勢造英雄。」市場上少了一班對手，客戶自然轉聘他人，考慮他這類後備。

「我唔介意做後備。」最低工資委員會主席一職，勞工及福利局局長張建宗首選是鄭若驊，但鄭推了，他執二攤。

未做資深大狀前，他經常為一些前輩做副手，紀錄良好，他又按師傅馬道立吩咐，「升級」後首兩年不加價，很快便逐步接棒坐正。「Timing好，上位快好多。」

隨後大案不絕，單是小甜甜龔如心跟家翁爭產的官司，便做了幾年，又多接了政府的官司。「以前有打過政府嘅case，但做副手，到其他人唔得閒時，政府就會搵你，信得過唔會亂來。」打響名堂後，福臨門七哥徐維均和鏞記的大哥甘健成、亞視的債權人王征也找上門。

因經常代表政府打官司，例如居港權司法覆核案和民間電台成員違反禁令開咪，故被標籤政府「御用」大狀。但他說，大律師這個行業，如同揸的士：「好似鏞記同福臨門，邊個嚟搵我先，我就幫邊個打。」無可否認，大多是有錢人和政府找他打官司。「我接過好多同政府打對台嘅官司，只係settle咗無人知啫。」

自小一帆風順

他坦言，從小到大，事業都一帆風順。自小在長洲長大，讀長洲國民學校，父母是教師，父親翟仕堯是當代書法家，師承水墨畫家呂壽琨。但他成績永遠不是最好那個，從未考過第一。

「我媽媽講得我最準，就係唔使用十足力，考到第二，但做到十足，都唔會考第一。」他不屬於勤力型，是小時候每天會睡十四小時，然後通山跑那類頑童。升中試考得不錯，足以入讀拔萃。中一第一個學期，英文不合格，但中二，已取得九十分。沒資格加入游泳隊，便退而求其次參加拯溺隊，最後以後備身份入選。

小時候原先想做音樂家，拉大提琴，學鋼琴，後來發現，音樂天分有限。於是，發掘其他興趣，加入學校辯論隊。老師認為他應發揮辯才，順理成章報讀法律。

會考成績中上。「好似三、四個A幾個B啩。」那時少人讀法律，他決定到英國升學，擴濶眼界。報考海外升學試，卻大懵忘了問父親拿支票交考試費，也是截止當日跑去問拔萃校長James Lowcock借支票。

師傅皆猛人

他分別在英國倫敦大學和牛津大學，取得法學學士和民事法學士學位，八九年畢業，遇上六四民運。大部分同學決定留在英國，但他不想做二等公民，又沒家庭負擔，決定回港搏一鋪，有危就有機。

原先李國能願意待他回港時收他為徒，但李後來獲委任為御用大狀，當時御用大狀不能收徒弟，翟紹唐於是向李義敲門，跟了三個多月，李義又獲委任為御用大狀，於是他餘下的九個月便跟林孟達、馬道立和其妻袁家寧學師。有四位師傅，行內罕見，他也甘於被當作人球，因每位師傅都是猛人。

他學師完畢，幾個月後剛好全港最top打民事案的大律師行Temple Chambers有空缺讓他加入，自此順風順水。「我有啲徒弟好叻，不過去咗啲唔係好適合佢嘅chambers，發展亦都無咁好。有時啲嘢好睇機遇，你可以叫luck又好，whatever you may call it。」

他從未打過工，連暑期工也未做過，但卻當上最低工資委員會主席。「咁仲好，形象更加中立。」他坦言從未捱過，住的是南灣道市值幾千萬元的豪宅，有多部名貴跑車。但起碼他知道廿八蚊時薪是有X種計法，廿八蚊還夠在大家樂和大快活吃早餐，但午餐便「抿水」。

擇路而行

雖說時勢造就，但翟紹唐其實是擇路而行。很多人推崇的大律師公會主席一職，他說咪搞。「呢行太保守，好顧自己利益，我唔覺得值得嘥時間幫呢班人。」他還跟記者說，做過兩屆執委，發現有些工作相當無謂。「你話同內地部門交流，其實好表面，上到去只係傾吓偈食吓飯，飲飲食食，十一、二月去，一日食三餐大閘蟹咁囉。」他批評政府叫最低工資由勞資雙方協商一樣，也是抱這種態度：「That's me。我只係講啲阿媽係女人嘅嘢。」

他寧願接些和公眾利益有關的工作，例如馬尼拉的死因研訊，讓公眾，包括死傷者明瞭事件來龍去脈和澄清傳聞。「你話菲律賓政府要負責，一直都係港人自講，今次研訊俾大家另一個角度睇件事，例如班友係著住戰前避彈衣，其實佢哋係好勇敢，要鬧就鬧佢哋啲阿頭，點解嗰個時候仲走去食飯。」

又是時間巧合，他再接政府「工程」，原先他手上有一宗官司定於今年三月開審，但去年底達成和解，數天後，便接到當時的副刑事檢控專員薛偉成來電，問他有沒有興趣擔任這宗案的死因研訊主任。

每一個決定，就像早有安排。「你話神安排又得，命運安排又得，好彩又得。